«Ազատ Դեմոկրատներ» կուսակցության անդամներ Դավիթ Օնոփրիշվիլին, Վիկտոր Դոլիձեն, Գիա Ցագարեիշվիլին և Զուրաբ Աբաշիձեն լքեցին կուսակցության շարքերը:
Այս կապակցությամբ կուսակցության առաջին դեմքերը «Ազատ Դեմոկրատներ»-ի կենտրոնական գրասենյակում ասուլիս էին հրավիրել: Կուսակցությունը լքելու վերաբերյալ լուրն առաջինը հայտնեց Զուրաբ Աբաշիձեն.
«Կուսակցության ներսում անցկացրած խորհրդակցությունների արդյունքում որոշում ընդունեցի դադարեցնել իմ կուսակցական գործունեությունը: Ողջունում եմ կուսակցության նոր անդամներին, շատ հաճելի է այստեղ տեսնել էներգիայով լի մարդկանց: Ուզում եմ նշել, որ ինձ համար պետության շահը մշտապես առաջին տեղում է եղել։ Ապագայում ինչ կլինի՝ կյանքը ցույց կտա»:
Գիա Ցագարեիշվիլին նշեց, որ անկախ նրանից ընտրությունների արդյունքները դուր է գալիս իրենց, թե ոչ, պետք է հարգել ժողովրդի կատարած ազատ ընտրությունը: Ցագարեիշվիլին իր ելույթում առանձնացրեց 3 հայտարարություն.
«Առաջին հերթին պետք է ասեմ, որ ես նույնպես լքում եմ կուսակցության շարքերը։ Երկրորդ՝ ես մինչև վերջ կպայքարեմ մեր 5 անմեղ ընկերներին բանտից ազատելու համար և երրորդ՝ որպես Արևելյան համագործակցության խորհրդարանական ժողովի նախագահ շարունակելու եմ աշխատել ևս 3 ամիս, որպեսզի ԵՄ-ի հետ ընդունենք վիզայի ազատ ռեժիմ»:
Կուսակցության անդամ Վիկտոր Դոլիձեն հայտնելով իր կողմից կուսակցությունը լքելու մասին լուրը, նշեց, որ 7 տարի պայքարել է կուսակցության ներսում և կուսկցության համար: Սակայն, չնայած մեծ ջանքերին, խորհրդարանում տեղ չեն գտել.
«Մեր ընտրողը մեզ այլ կերպ գնահատեց՝ չտալով խորհրդարան մտնելու հնարավորություն: Ես լքում եմ «Ազատ դեմոկրատներ»-ի շարքերը, սակայն ամենայն պատասխանատվությամբ եմ հայտարարում, որտեղ և ինչ ոլորտում էլ լինեմ, կմնամ իմ երկրի շահերին հավատարիմ»:
Վերոնշյալ հայտարարություններից հետո շտապեց հայտարարություն անել նաև կուսակցության գործադիր քարտուղար Թամար Կեկենաձեն.
«Պետք է հուսախաբ անեմ բոլոր նրանց, ովքեր մտածում էին, որ այս կուսակցությունը կդադարի իր գործունեությունը: Մեր անդամները ազատ որոշում են կայացրել լքել կուսակցությունը, սակայն կուսակցության անձնակազմը կնորացվի և մենք կշարունակենք մեր պայքարը Վրաստանի բարեկեցության համար և կպատրաստվենք 2017 թվականի տեղական ինքանկառավարման ընտրություններին»։
Կուսակցության ղեկավարի պաշտոնում մինչև ընտրությունների ավարտը կշարունակի մնալ Իրակլի Ալասանիան; Հիշեցնենք՝ նա հոկտեմբերի 10-ին հայտնել էր կուսակցությունից ու քաղաքականությունից ժամանակավորապես դուրս գալու մասին: Հոկտեմբերի 10-ին կուսակցության շարքերը լքել է նաև կուսակցության անդամ, Վրաստանի Եվրաինտեգրման նախկին նախարար Ալեքսի Պետրիաշվիլին:
