39, 40 և նույնիսկ մինչև 43 աստիճան տաքություն․․․ Թեև ամռանը շատերս ենք սպասում, սակայն օդի ջերմաստիճանի նման բարձրացման մարտահրավերը ոչ բոլորն են կարողանում հաղթահարել։
Առողջապահության համաշխարհային կազմակերպության տվյալների համաձայն՝ 2003 թվականին, Եվրոպայում «տաք ալիքները» դարձել են 70,000 մարդու մահվան պատճառ:
Ինչի՞ է բարձր ջերմաստիճանը խնդիր:
- Այն օրգանիզմում առաջացնում է դեհիդրատացիա (ջրազրկում)
- Սրտի և շնչառական խնդիրներ ունեցող մարդկանց առողջական վիճակի վատթարացում
Ո՞ւմ համար է վտանգն ավելի մեծ:
- 75 տարեկան և ավելի տարեցների
- Երեխաների, հատկապես նորածինների
- Խրոնիկ հիվանդություններ ունեցողների
- Տեղաշարժման խնդիր ունեցող մարդկանց
- Հոգեկան առողջության հետ կապված խնդիր ունեցող մարդկանց
- Ալկոհոլ և թմրանյութեր օգտագործողների
- Ֆիզիկապես ակտիվ մարդկանց
Ամառը լուրջ մարտահրավեր է ալերգիկների համար։ Ալերգիայի և իմունոլոգիայի կենտրոնի բժիշկ-ալերգոլոգ Նինո Լոմիձեն, հատկապես ծովափնյա հատվածներ մեկնողներին, խորհուրդ է տալիս յուրաքանչյուր խնդրի դեպքում կամ թեկուզ պարզապես ապահովության համար դիմել բժշկի:
«Ամռան եղանակը՝ տաք և արևոտ օրերը, հատկապես վտանգավոր կարող են լինել ալերգիա ունեցող մարդկանց համար: Առաջինը, բնականաբար, արևային ալերգիան է, որը սպառնում է հատկապես նրանց, ովքեր ունեն բաց գույնի մաշկ, բաց գույնի մազեր: Արևի ճառագայթներից մարդու մաշկի այն հատվածների վրա, որոնք ծածկված չեն հագուստով՝ հիմնականում պարանոցի, կրծքավանդակի տարածքի, վերին և ստորին վերջույթների վրա, հնարավոր է լաքայի կամ բշտիկների տեսքով ցան առաջանա», — «Ալիք մեդիային» ասում է Լոմիձեն:
Ալերգոլոգը բոլորին, հատկապես ալերգիկներին, խորհուրդ է տալիս օգտագործել արևից պաշտպանող քսուք: Ըստ Լոմիձեի, առավոտյան ժամը 10:00-ից մինչև ժամը 16:00-ն ընկած ժամանակահատվածում պետք է զերծ մնալ արևի ճառագայթներից, քանի-որ հենց այդ ժամերին են ուլտրամանուշակագույն ճառագայթները ուժեղ:
Խեչինաշվիլիի անվան համալսարանական կլինիկայի այրվածքային կենտրոնի ղեկավար Գուգա Քաշիձեն տեղեկացնում է, որ երեկ, հուլիսի 2-ի դրությամբ, իրենց կլինիկա են դիմել 71 հիվանդ, որոնցից 55-ի այրվածքները կապված են արևայրուքի և տապի հետ:
Իսկ Նինո Լոմիձեն, «Ալիք մեդիայի» հարցին, թե նման խնդրով քանի՞ հիվանդ է դիմել իրենց, ասում է.
«Չնայած դեռ արևային այրվածքներով ոչ ոք չի դիմել մեզ, սակայն հատկապես վերջին շաբաթվա ընթացքում շատերն են դիմում արևային ալերգիայով կամ էլ արևից պաշտպանվելու խորհրդատվություն ստանալու համար: Մենք էլ ցուցաբերում ենք համապատասխան օգնություն և տալիս ցուցումներ»:
Այս օրերին տապն ամբողջ տարածաշրջանում է դարձել լուրջ խնդիր։ Հարևան Ադրբեջանում ըստ պաշտոնական տվյալների՝ անոմալ շոգի հետևանքով հուլիսի 2-ի ուշ գիշերը Մինգեչաուրի ՀԷԿ-ում վթար է եղել, որի հետևանքով առանց էլեկտրականության է մնացել Ադրբեջանի մեծ մասը: Իրանում էլ հրդեհներ են։ Առհասարակ, բարձր ջերմաստիճանի պատճառով մեծանում է հրդեհների առաջացման վտանգը, ուստի արտակարգ իրավիճակների վարչությունը կոչ է անում քաղաքացիներին պահպանել հրդեհային անվտանգության կանոնները։
