«Գիրչի» շարժման անդամները դեկտեմբերի 31-ին՝ ժամը 23:59- ին, սեփական գրասենյակում մարիխուանա կցանեն:
Նրանք այդ քայլին կդիմեն, եթե Վրաստանի 9-րդ գումարման խորհրդարանն ու նորընտիր կառավարությունը չփոխի թմրանյութերի հարցով տարվող կոշտ քաղաքականությունը։ Այս մասին հայտարարել է «Գիրչի» քաղաքական շարժման առաջնորդներից Զուրաբ Ջափարիձեն: Նա նշել է, որ կուսակցությունն արդեն նամակով դիմել է խորհրդարանին։
««Գիրչին» դիմում է խորհրդարանին՝ մարիխուանայի և այլ հոգեներգործուն նյութերի օգտագործումը, աճեցումն ու պահպանումը օրինականացնելու խնդրանքով»,-ասված է նամակում։
«Գիրչին» հիշեցնում է, որ նախորդ գումարման խորհրդարանում ձախողվեց մարիխուանայի օգտագործման համար պատժի չեղարկման մասին նախագիծը։
«Մեր առաջարկները նախորդ խորհրդարանի համար անընդունելի էին, սակայն մեր նպատակը ազատության սահմաններն ընդլայնելն է։ Ազատությունը հանդիսանում է ցանկացած այլ իրավունքի հիմքը, առանց որի գոյություն չունի ազատ հասարակություն»:
Խորհրդարանին ուղղված նամակում ասվում է նաև, որ տարիներ շարունակ պետությունը «դառնացրել» է հազարավոր մարդկանց ու նրանց ընտանիքների կյանքը:
«Այդ պատճառով մենք պահանջում ենք ապաքրեականացնել մարիխուանայի օգտագործումը, օրինականացնել անձնական օգտագործման նպատակով մարիխուանայի աճեցումն ու պահելը»:
«Գիրչին» գտնում է, որ մարիխուանայի օգտագործման ապաքրեկանացման համար ընդամենը քաղաքական կամք է պետք:
«Դեկտեմբերի 31-ին՝ ժամը 23:59- ին, մենք «Գիրչիի» գրասենյակում մարիխուանա կցանենք։ Մեզ կարող է միանալ նաև յուրաքանչյուր չափահաս կամավոր։ Մենք այդ քայլին կդիմենք, եթե նոր գումարման խորհրդարանը աշնանային նիստի ընթացքում համապատասխան օրենսդրական փոփոխություններ չձեռնարկի»,-ասում են «Գիրչիի» անդամները՝ գիտակցելով, որ այդ քայլով կխախտեն Վրաստանի քրեական օրենսգրքի 265-րդ հոդվածը, ինչը 6-12 տարի ազատազրկում է նախատեսում։
«Սա մեր քաղաքական պայքարի ևս մի ձև է: Հասկանում ենք, որ ռիսկի ենք դիմում, սակայն, հույս ունենք, որ անպայման կհաղթենք: Եթե այս անգամ հաղթենք, կհաղթենք նաև ազատության համար մղվող այլ պայքարներում»,- նամակի բովանդակությունն է փոխանցում «Interpressnews.ge» լրատվականը։
