Թբիլիսիի քաղաքային դատարանն ընդդիմադիր «Կոալիցիա փոփոխությունների համար»-ի մամուլի ծառայության աշխատակիցներ Միրանդա Բաղաթուրիային և Անա Կղուրաշվիլիին տուգանել է յուրաքանչյուրին 4000-ական լարիով։ Նրանք մեղադրվում են ոստիկանին «ստրուկ» և «կեղծ վկա» անվանելու համար։ Գործում չկա որևէ ապացույց, որը կհաստատեր այս փաստը։
Ապրիլի 17-ին Թբիլիսիի քաղաքային դատարանում լսվում էր «Կոալիցիա փոփոխությունների համար»-ի անդամ Սաբա Սխվիտարիձեի գործը, որը ձերբակալվել էր եվրոպամետ հանրահավաքի ժամանակ։ Այդ օրը որպես վկա հարցաքննվել էր ոստիկան Միրիան Քավթարաձեն, որին ակտիվիստները «կեղծ վկա» են անվանել։ Հենց այդ օրը «Կոալիցիա փոփոխությունների համար»-ի մամուլի ծառայության աշխատակիցները Քավթարաձեին անվանել են «ստրուկ» և «կեղծ վկա»։
Միրանդա Բաղաթուրիային կայանալիք դատական նիստի մասին տեղեկացրել են ապրիլի 23-ին։ Այդ օրը նա Facebook սոցիալական ցանցում գրել է, որ չի տեսել այն ոստիկանին (Միրիան Քավթարաձեին), որին մեղադրում են այդ օրը վիրավորելու համար։
Դատավորը համաձայնել է ոստիկանների բողոքներին և տուգանել թե՛ Միրանդա Բաղաթուրիային, թե՛ Անա Կղուրաշվիլիին։
