Վրաստանի հանրային դպրոցներում կրթությունը, հավանաբար, կկրճատվի մեկ տարով. 12-ամյա ուսումնական համակարգը կփոխարինվի 11-ամյայով:
«Վրացական երազանք»-ի բարեփոխումը նախատեսում է կրճատել կրթական գործընթացը թե՛ համալսարաններում, թե՛ դպրոցներում։
Բուհական համակարգում՝ «բացառիկ մասնագիտություններից բացի, պետք է ներդրվի 3+1 համակարգ, որտեղ 3 տարի կտրվի բակալավրի աստիճանի համար, իսկ 1 տարի՝ մագիստրոսի աստիճանի»։
Դպրոցներում շուտով նոր մտահղացումը կներկայացվի, ըստ որի` կներդրվի «11-ամյա կրթական ծրագիրը». «Կրթության նախարարությունը նույնպես ակտիվորեն աշխատում է այս ուղղությամբ»։
Կոբախիձեն «Իմեդի»-ին տված հարցազրույցում պարզաբանել է, որ ֆինանսները կխնայվեն «բազմաթիվ ուղղություններով», և կփոխվի նաև կրթության տևողությունը:
Վրաստանում 12-ամյա դպրոցական կրթական համակարգին անցնելու մասին որոշում է կայացվել 2005 թվականին՝ «Ազգային շարժման» կառավարման տարիներին։ Այս նորամուծությունը ներառվել է «Ընդհանուր կրթության մասին» օրենքում։ Այս նոր համակարգը նպատակ ուներ համատեղելիություն ապահովելու «Բոլոնիայի գործընթացի» հետ։ Վրաստանի միջնակարգ դպրոցի աշակերտները 12-ամյա կրթական համակարգին անցան 2008-2009 ուսումնական տարում։
Կրթական համակարգի մի շարք փորձագետներ մտահոգություն են հայտնել 11-ամյա կրթության վերաբերյալ։
«12-ամյա կրթական համակարգն անհրաժեշտ է, որպեսզի մեր դպրոցական դիպլոմները ճանաչվեն Եվրոպայում ու Ամերիկայում, և որպեսզի երիտասարդները հեշտությամբ շարունակեն իրենց ուսումն արտասահմանում: Ահա թե ինչու մենք անցանք 12-ամյա կրթական համակարգի Բոլոնիայի գործընթացի շրջանակներում», — ասել է Նանա Դիխամինջիան` ինժեներական բնագավառի պրոֆեսոր, որը մեծ փորձ ունի Վրաստանում և ԱՄՆ-ում ակադեմիական աշխատանքի առումով։
Դիխամինջիան նաև պարզաբանել է, որ 11 տարվա ուսումից հետո «ուսանողը կարող է շարունակել ուսումն արտասահմանյան համալսարաններում, բայց շատ ավելի բյուրոկրատական խոչընդոտներով», և «որոշ համալսարաններ նույնիսկ ընդհանրապես չեն քննարկի նրա դիմումը»։
Կոբախիձեն ասել է, որ դպրոցական կրթությունը չպետք է լինի 12 տարի արտասահման մեկնելու ցանկության պատճառով։
Հոկտեմբերի 17-ին Իրակլի Կոբախիձեն լրագրողներին ասել է, որ պետության առաջնահերթությունն է «վրացի աշակերտների բարձր մակարդակի կրթություն ստանալը Վրաստանում, և դրան է ծառայում բարեփոխումների ծրագիրը», իսկ արտասահման մեկնել ցանկացողները հնարավորություն կունենան ավարտելու 12-րդ դասարանը «մասնագիտացված դպրոցներում» կամ «աշակերտը կգնա արտասահման, կավարտի տասներկուերորդ դասարանն այնտեղ, և եթե ցանկանա, կշարունակի ուսումը արտասահմանում առաջին կուրսից»։
Ծնողների մի մասը կողմ է այս բարեփոխմանը. «12-րդ դասարանում ոչինչ չեն անում»:
«Վրացական երազանք»-ի ծրագիրը հետևյալն է. 2-3 շաբաթվա «հանրային քննարկումներից» հետո կառավարությունը կհաստատի կրթության հայեցակարգը և կսկսի իրականացումը։
«Համակարգի վերակազմակերպման, կադրային քաղաքականության կատարելագործման»՝ «էական փոփոխությունների» առումով արդյունքները սպասվում են մեկ տարվա ընթացքում։
Կան հարցեր, որոնք կտևեն մի քանի տարի` «ներառյալ ենթակառուցվածքների զարգացումը»։
