Այսօր՝ մայիսի 5-ին, Եվրախորհրդարանի արտաքին հարաբերությունների հանձնաժողովը 53 կողմ և 14 դեմ ձայներով ընդունեց Վրաստանի վերաբերյալ քննադատական զեկույցը։
Քվեարկությունից առաջ համառոտ ելույթ ունեցավ հարցի վերաբերյալ զեկուցող, Եվրոպական ժողովրդական կուսակցության լիտվացի պատգամավոր Ռասա Յուկնևիչիենեն։ Ի դեպ, տարիներ շարունակ նրան քննադատել են «Վրացական երազանք»-ի առաջնորդները:
Նրա խոսքով՝ զեկույցն ընդունվում է Երևանում ընթացող գագաթնաժողովին զուգահեռ։
Սա Վրաստանի՝ որպես ԵՄ թեկնածու երկրի վերաբերյալ երկրորդ զեկույցն է, որը պատրաստվել է Եվրահանձնաժողովի Վրաստանի վերաբերյալ 2025 թվականի զեկույցի լույսի ներքո։
«Զեկույցը կենտրոնացել է Եվրախորհրդարանի հիմնական մտահոգությունների վրա՝ Վրաստանում ժողովրդավարության վիճակի, օրենքի գերակայության և եվրոպական ինտեգրման վերաբերյալ»։
Զեկույցի նախագծի համաձայն՝ Եվրախորհրդարանը կրկին իր լիակատար համերաշխությունն է հայտնում վրաց ժողովրդին, «որը շարունակում է պայքարել եվրոպական և ժողովրդավարական Վրաստանի համար՝ ժողովրդավարական նահանջի, աճող բռնաճնշումների, անդադար թշնամական հռետորաբանության, ապատեղեկատվության և սպառնալիքների պայմաններում»։
Փաստաթղթի հեղինակները ողջունել են ԵԱՀԿ 24 անդամ պետությունների ձեռնարկած «Մոսկվայի մեխանիզմի» գործարկումը և դրա հիման վրա պատրաստված նույնքան քննադատական զեկույցը։
Զեկույցի համաձայն, Եվրախորհրդարանի պատգամավորները կոչ են արել Վրաստանի կառավարությանը` ստեղծել անկախ հաշվետվողականության մեխանիզմներ մեղավորներին պատասխանատվության ենթարկելու, ընտրական միջավայրը բարելավելու անկախ և անաչառ ընտրական վարչակազմի միջոցով, լուծելու օլիգարխացման խնդիրը և չեղյալ համարելու բռնաճնշողական օրենսդրական փոփոխությունները։
Մայիսի 5-ին Երևանում բացվեց Հայաստան-ԵՄ առաջին գագաթնաժողովը, որը վարում էին ՀՀ վարչապետ Նիկոլ Փաշինյանը և Եվրոպական խորհրդի ու Եվրոպական հանձնաժողովի նախագահներ Անտոնիո Կոստան ու Ուրսուլա ֆոն դեր Լայենը։
Հայաստան-ԵՄ գագաթնաժողովից առաջ մայիսի 4-ին Երևանում տեղի ունեցավ Եվրոպական քաղաքական միության գագաթնաժողովը։
«Կարծում եմ՝ յուրաքանչյուր եվրոպամետ վրացի ուրախ է, որ եվրոպական հեռանկարը ներկա է Հարավային Կովկասում, չնայած հասկանում եմ վրացիների հիասթափությունը, որ Թբիլիսին դուրս է մնացել այս գործընթացից։ Բայց ես դեռ հավատում եմ Վրաստանի և վրաց ժողովրդի եվրոպական հեռանկարին», — ասել է Յուկնևիչիենեն:
