Վրաստանի ներքին գործերի նախարարությունը 241 հազար 272 եվրո կվճարի մարդու հոտի հետքով աշխատող և թմրամիջոցների հայտնաբերման համար նախապես վարժեցված շների ձեռքբերման համար։

Գնումը ներառում է մարդու հոտի հետքով աշխատող 5 նախապես վարժեցված/մասնագիտացված շուն և թմրամիջոցների հայտնաբերման գծով մասնագիտացված 10 շուն։

Նախարարությունը ձեռք կբերի նաև 15 պլաստիկ վանդակ, 15 ջրաման, 30 հատ XL չափսի հատուկ գնդակ, պարեկության և որոնման կապեր, խոզանակներ, ծառայողական բաճկոնակներ, սանձեր և տարբեր տեսակի վզկապներ։ Գնումների ցանկում ներառված են նաև 15 հեռակառավարվող էլեկտրոնային վզկապ և 30 «Police K9» նշան։

Գնման շրջանակներում նախատեսված է նաև կինոլոգի ուսումնական դասընթաց, որը պետք է ներառի միջազգային սերտիֆիկացում։

Պետական գնումների գործակալության համակարգում հրապարակված տեղեկության համաձայն՝ գնման հիմք է նշված «միջոցառման անխափան անցկացումը սահմանափակ ժամկետներում»։ Համապատասխան պարզեցված գնման վերաբերյալ համաձայնությունը Ներքին գործերի նախարարությունը ստացել է 2025 թվականի հոկտեմբերի 2-ին։