ԱՄՆ Կոլումբիայի շրջանային դատարանը Վրաստանին պարտավորեցրել է թուրքական ENKA ընկերությանը վճարել արբիտրաժով սահմանված ավելի քան 400 միլիոն դոլարի փոխհատուցում․ այս մասին նշված է 2026 թվականի սեպտեմբերի 11-ով թվագրված որոշման մեջ։

Վրաստանի կառավարությունը մինչ այժմ փորձում էր կասեցնել այս փոխհատուցման վճարումը Ֆրանսիայի իրավասության ներքո, որտեղ Միջազգային առևտրային պալատի (ICC) արբիտրաժային կոլեգիան քննել էր գործը և դեռևս 2024 թվականի դեկտեմբերին Վրաստանին պարտավորեցրել վճարել 383 միլիոնանոց փոխհատուցում։ Բացի այդ, փոխհատուցմանը հավելվում է տոկոսադրույք, որը հաշվարկվում է փոխհատուցման մայր գումարի վրա յուրաքանչյուր չվճարված եռամսյակի համար․ այս պահի դրությամբ ընդհանուր փոխհատուցումը զգալիորեն գերազանցում է 400 միլիոն դոլարը։ Ֆրանսիայի դատարանում քննությունների ավարտից առաջ փոխհատուցման կատարումը կասեցված էր։ Սակայն այժմ, արդեն ԱՄՆ դատարանի վճռով, սահմանված է դրա կատարման գործընթացի մեկնարկը։

Ինչպես պարզվում է դատարանի արձանագրությունից, ENKA Renewables-ը դիմել է ԱՄՆ Կոլումբիայի շրջանային դատարան, որովհետև ԱՄՆ-ն հանդիսանում է Արբիտրաժի մասին 1958 թվականի Նյու Յորքի միջազգային կոնվենցիայի ստորագրող կողմ, և դրա իրավասության կիրառումը վեճի կողմերը կարող են արդարացիորեն օգտագործել։ ENKA-ններկայացրել է 2024 թվականի դեկտեմբերի վճիռը, որի հիման վրա էլ ԱՄՆ Կոլումբիայի շրջանային դատարանը վճիռը մտցրել է ի կատարումն։