Վրաստանի հատուկ քննչական ծառայությունը (ՀՔԾ) Վրաստանի խորհրդարանի մոտ բողոքի ակցիայի ժամանակ պաստառների վրայի գրառումների պատճառով ակտիվիստներին բերման ենթարկելու փաստով դեռ քննություն չի սկսել։
ՀՔԾ-ից Netgazeti-ին հայտնել են, որ հետաքննություն սկսելու խնդրանքով գերատեսչություն ոչ ոք չի դիմել, հետևաբար` հետաքննություն չի սկսվել։
«Վրաստանի դեմոկրատական նախաձեռնություն» կազմակերպության փաստաբան Գիորգի Մշվենիերաձեն ասել է, որ ՀՔԾ-ն իր մանդատի շրջանակներում կարող է հետաքննություն սկսել առանց որևէ բողոքարկման:
Մշվենիերաձեի խոսքով, ՀԿ-ները մոտ ժամանակներս գործակալություն կդիմեն հունիսի 2-ին ձերբակալվածների վերաբերյալ։
Ի դեպ, հունիսի 2-ի երեկոյան մի քանի միջադեպ է տեղի ունեցել Վրաստանի խորհրդարանի մոտ, որտեղ ընթանում էր «Ջիուտի» շարժման կազմակերպած խաղաղ ակցիան։
Նախ՝ ձերբակալվել էր փաստաբան Շոթա Թութբերիձեն, որի ձեռքին «Իրակղլի» մակագրությամբ ցուցապաստառ է եղել: Դրանից հետո ոստիկանությունը շարունակել է քաղաքացիներից խլել բողոքի ցուցապաստառները և ձերբակալել նրանցից մի քանիսին։ Նրանցից մեկից ոստիկանները նաև առանց գրառման թուղթ են խլել։
«Վրաստանի դեմոկրատական նախաձեռնություն» ՀԿ-ի նախագահ Էդուարդ Մարիկաշվիլին ձերբակալվել է հենց այդ դատարկ թղթի պատճառով։ Ձերբակալվածների թվում են «Բաց հասարակության հիմնադրամ»-ի աշխատակից Սաբա Բրաճվելին, ակտիվիստ Նիկա Ռոմանաձեն, Լաշա Ջանջղավան և այլք։
Ընդհանուր առմամբ, հունիսի 2-ին ոստիկանությունը ձերբակալել է 7 հոգու, նրանք տեղափոխվել են Դուշեթիի և Կախեթիի շրջանների քննչական մեկուսարաններ. այնտեղ պետք է անցկացնեն կալանքի առավելագույն ժամկետը՝ 48 ժամ։
