«Kvira.ge»-ն փոխանցում է, որ Վրաստանի նախկին վարչապետ Բիձինա Իվանիշվիլին վստահեցրել է, թե առաջիկա ընտրությունների արդյունքում խորհրդարանում«Վրացական երազանք» կուսակցությունը միջին հաշվով 95 պատգամավոր կունենա:
Իվանիշվիլիի համոզմամբ` կուսակցության ներքին հարցումները ցույց են տալիս, որ իր հիմնադրած քաղաքական ուժի վարկանիշը նախընտրական շրջանում կտրուկ կբարձրանա: Վրաստանի նախկին վարչապետը խոսել է նաև «NDI»-ի և «IR»-ի հետազոտությունների մասին` նշելով. «երկու կազմակերպություններին էլ հարգանքով եմ վերաբերվում և ուզում եմ, որ ամերիկյան այս հաստատությունների հանդեպ հասարակության մեջ նիհիլիզմ չառաջանա»:
«Netgazeti.ge»-ն գրում է ՝ Ստամբուլում ոստիկաններ տեղափոխող ավտոբուսի վրա տեղի ունեցած հարձակման հետևանքով զոհվել է 11, վիրավորվել` տասնյակ մարդիկ: Զովածներից յոթը ոստիկան է, չորսը` քաղաքացիական անձիք: Այս տարի Թուրքիայում սա թվով 4-րդ ահաբեկչությունն է: Դեռևս ոչ մի ահաբեկչական խմբավորում իր վրա չի վերցրել կատարավածի պատասխանատվությունը: Սակայն Թուրքիայի նախագահ Ռեջեփ Թայիփ Էրդողանը կրկին մեղադրել է «Քուրդ անջատողականներին»:
«Kvira.ge»-ն գրում է, որ Վրաստանի վարչապետ Գիորգի Կվիրիկաշվիլին Ստամբուլում տեղի ունեցած ահաբեկչական գործողության կապակցությամբ ցավակացական հեռագիր է ուղարկել. «Ցավում եմ Ստամբուլի կենտրոնում տեղի ունեցած ահաբեկչության համար: Ցավակցում եմ զոհվածների ընտանիքներին և հարազատներին, թուրք ժողովրդին ու երկրի կառավարությանը: Ցավալի է, որ ժամանակակից աշխարհում անմեղ մարդկանց օգտագործում են որպես զենք»,- ասված է Կվիրիկաշվիլիի ցավակցական նամակում:
Վրաստանի Հանրապետական կուսակցության ղեկավար Դավիթ Բերձենիշվիլին պարզաբանել է, որ Բիձինա Իվանիշվիլիի կողմից «Վրացական երազանք» կուսակցությանն աջակցությունը բնական երևույթ է: «Բիձինա Իվանիշվիլին ազնվորեն ասում է, որ իր հիմնադրած «Վրացական երազանքը» իր կուսկցությունն է: Սրանում վատ բան չկա: Նա ասել է նաև, որ մի կուսակցություն ներկայացուցիչ հանդիպել է իրեն, խնդրել ընտրություններում չաջակցել որևէ մի ուժի: Դա մենք չենք: Ինչպես միշտ, հիմա էլ կասեմ, որ բարձր եմ գնահատում 2012 թ. խորհրդարանական ընտրություններում Բիձինա Իվանիշվիլիիի դերը, սակայն կարծում եմ, որ անցյալում «Միացյալ ազգային շարժումը» և ներկայիս «Վրացական երազանքը» այլևս չեն արտացոլում Վրաստանի ապագա քաղաքական տարածությունը: Այն պետք է լինի ավելի լավ և ավելի բազմազան»,-հայտարարել է Բերձենիշվիլին:
«Kvira.ge»-ն տեղեկացնում է, որ Վրաստանի նախագահ Գիորգի Մարգվելաշվիլին հանդիպել է Եվրախորհրդարանի արտաքին գործերի հանձնաժողովի նախագահ Էլմար Բրոկի հետ: Կողմերը կարևորել են Երվրախորհրդարանում Վրաստան-ԵՄ հարաբերությունների շուրջ ծավալված բանավեճը` ընդգծելով, որ Վրաստանի նախագահի այցը Ստրասբուրգ տեղի է ունենում ճիշտ ժամանակին:
Ինչպես նշել է Գիորգի Մարգվելաշվիլին, Վրաստանը վիզայի ազատականացման համար կատարել է ստանձնած բոլոր պարտավորությունները, սակայն կարևոր է, որ հետագայում եվս այդ գործընթացներն իրականացնի սահուն կերպով:
Մարգվելաշվիլին Էլմար Բրոկի հետ խոսել է նաև երկրի ժողովրդավարական բարեփոխումների, առաջիկա խորհրդարանական ընտրությունների ու նախընտրական միջավայրի մասին:
«Interpressnews»-ը շարունակում է անդրադառնալ ռուս-վրացական սահմանում Վրաստանի քաղաքացու սպանության դեպքին: Պարբերականի փոխանցմամբ` Վրաստանի արտաքին գործերի փոխնախարար Դավիթ Զալկալիանին հայտարարել է, որ Վրաստանի վարչապետը շատ հստակ ասել է, որ Գիգա Օթխոզարիային սպանողը պետք է հանձնվի և դատապարտվի Վրաստանի օրենսդրությամբ: Նրա խոսքով` սա ժնևյան առաջիկա բանկացությունների օրակարգային հարցերից մեկն է լինելու:
