«Վրաստան այցելող օտարերկրյա զբոսաշրջիկները պետք է հաշվի առնեն «օկուպացված տարածքների մասին» օրենքը»: Այսպես է արձագանքել Վրաստանի վարչապետի ՌԴ-ի հետ հարաբերությունների կարգավորման հարցերով հատուկ բանագնաց Զուրաբ Աբաշիձեն՝ մեկնաբանելով Ռուսաստանի զբոսաշրջության դաշնային գործակալության («Ռոստուրիզմի») կողմից արված հայտարությունը։ Հիշեցնենք՝ գործակալությունը տեղեկացրել է, որ Վրաստան մեկնող ռուսներին մշտապես պետք է զգուշացնել հնարավոր վտանգների մասին։
«Այս տարի Վրաստանը ռեկորդային թվով զբոսաշրջիկներ է ընդունել, որոնց թվում մեծ տեղ են զբաղեցրել հատկապես Ռուսաստանի քաղաքացիները: Մեր կառավարությունը խելամիտ քաղաքականություն է վարում զբոսաշրջության զարգացման համար՝ ստեղծելով հարմար և անվտանգ պայմաններ»,-ասել է Աբաշիձեն՝ նշելով, որ, սակայն, զբոսաշրջիկները պետք է հաշվի առնեն Վրաստանի օրենքները, մասնավորապես «օկուպացված տարածքների մասին» օրենքը:
ՌԴ-ի հետ հարաբերությունների կարգավորման հարցերով հատուկ բանագնացը նաև ավելացրել է, որ այս տեսանկյունից զիջումներ չեն լինելու։
«Համամիտ եմ այն հայտարարությունների հետ, ըստ որոնց արտասահմանյան զբոսաշրջիկները Վրաստանում պետք է ունենան բժշկական ապահովագրություն, որպեսզի խուսափեն ավելորդ խնդիրներից»,-նշել է Աբաշիձեն:
Հիշեցնենք՝ «Ռոստուրիզմը» Ռուսաստանի Արտաքին գործերի նախարարության խորհրդով կոչ է արել զբոսաշրջային կազմակերպություններին Վրաստան մեկնող քաղաքացիներին զգուշացնել հնարավոր վտանգների մասին՝ պարզաբանելով, որ դիվանագիտական հարաբերությունների բացակայության պայմաններում առաջացած խնդիրները շատ դժվար են լուծում գտնում:
