Վերջին շաբաթվա ընթացքում վրաստանյան մամուլն ակտովորեն անդրադառնում էր Թբիլիսիի Աղմաշենեբելի 38 հասցեում գտնվող վնասված (խոնարհված, խմբ.) Թանդոյանց եկեղեցու հարցին: Վրացական ԶԼՄ-ների ուշադրության կենտրոնում էր Նարիկղալայի բերդի հարակից տարածքից հանված եւ Թանդոյանց եկեղեցու տարածք տեղափոխված աղյուսները, որի մասին ռեպորտաժ էր պատրաստել «Ռուսթավի 2» հեռուստաընկերությունը: Տարածված հոդվածներում կարեւորվում է նաեւ Վիրահայոց թեմի` Թբիլիսիի Թանդոյանց եկեղեցին թեմին կամ նախկին կարգավիճակին վերադարձնելու պահանջով դատական հայցը, որի շրջանակներում առաջին դատական նիստը նախատեսվում է մարտի 13-ին:
Այսպես, Հայաստանին եւ հայկական թեմաներին հաճախակի անդրադարձող Netgazeti.ge հարթակը «Թանդոյանց եկեղեցին պատրիարքարանին փոխանցելու պատճառով դատարանին են դիմել» վերտառությամբ հոդված է հրապարակել: Հոդվածում նշվում է, որ Թեմին իրավաբանական աջակցություն է ցուցաբերում Մարդու իրավունքների հետազոտությունների եւ մոնիտորինգի կենտրոնը եւ Վրաստանի համերաշխության և բազմազանության ինստիտուտը:
Հայցվոր կողմը գտնում է, որ Վրաստանի հանրային ռեեստրը «Թանդոյանց» հայկական եկեղեցին փոխանցել է վրաց Պատրիարքարանին, առանց ուսումնասիրելու եկեղեցու ծագումը, ինչպես նաեւ արդյո՞ք այս եկեղեցին երբեւէ հանդիսացել է վրաց ուղղափառ եկեղեցու սեփականությունը: Դատարանից բացի, վարչական դատավարություն է ընթանում Էկոնոմիկայի նախարարության սեփականության ազգային գործակալության դեմ, որը Թանդոյանց եկեղեցին հանել է իր բալանսից, այս կերպ է՛լ ավելի է հեշտացրել եկեղեցին պատրիարքարանին փոխանցելու գործընթացը»,- ասվում է Netgazeti.ge-ի հոդվածում: Նշված հոդվածի ռուսերեն թարգմանությունը հրապարակել է նաեւ Грузия Онлайн լրատվական կայքը:
«Ի՞նչ է կատարվում Թանդոյանց եկեղեցու շուրջ» վերնագրով հոդվածում artnews.ge կայքը մեջբերել է TDI-ի ծավալուն զեկույցը: Հոդվածը սկսվում է հետեւյալ տողերով. «2017թ հուլիսին իշխանությունը Թբիլիսիում Աղմաշենեբելի պողոտայի 38 հասցեում գտնվող վնասված եկեղեցին եւ դրա հարակից տարածքը Վրաստանի պատրիարքարին փոխանցեց: Առաջին հայացքից, այս փաստը ընդհանրապես զարմանալի չէ, սակայն ամեն ինչ իր հակառակ կողմն ունի»:
Նարիկղալայից Թանդոյանց եկեղեցի աղյուսներ տեղափոխելու հարցին է անդրադարձել mediamall.ge եւ fortuna.ge կայքերը, հոդվածը վերնագրելով՝«Թանդոյանց եկեղեցու տեսքը փոխում են»: Լրատվամիջոցները մեջբերել են ֆեյսբուքյան օգտատերերից մեկի գրությունը.
«Թանդոյանց եկեղեցու տեսքը փոխում են: Աղմաշենեբելի 38 հասցեում ընթանում է հայկական եկեղեցու տեսքի փոփոխություն: Աղյուսների պաշտոնական որս է հայտրարարել ոմն Ինգա Վաչեիշվիլին: Սա անհավատալի փաստ է: Նախ հանցագործություն է, որ գաղտնի կերպով պատրիարքարանին է փոխանցվել կոմունիստների ժամանակ յուրացված հայկական եկեղեցին, երկրորդը, որ վանդալների ձեռքում է, երրորդը այն, որ եզրակացություններ է գրում եւ հնագիտական վերլուծություններ է անում Մերաբ Ձնելաձեն, որը 500 լարի արժեցող եզրակացություն էր գրել եւ ներդրողների գրպանն է դրել Միրզաշաֆան»:
Թեմային անդրադարձել է նաեւ liberali.ge-ն, որը զրուցել է «պարտիզան այգեգործ» Նատա Փերաձեի հետ, որի խոսքով աղյուսները տեղափոխել են Թանդոյանց եկեղեցի Մերաբ Ձնելաձեի հանձնարարությամբ: Լրատվամիջոցի հետ զրույցում Մերաբ Ձնելաձեն, ով զբաղվում է եկեղեցու վերականգնմամբ, չի հաստատել աղյուսների տեղափոխման փաստը, սակայն նշել է, որ տվյալ աղյուսներն ապագայում կօգտագործվեն մի քանի եկեղեցու վերանորոգման համար: Մերաբ Ձնելաձեն տարբեր նախագծերի շրջանակներում մշակութային ժառանգության պաշտպանության ազգային գործակալության հետ է համագործակցում:
Տարբեր օգտատերերի կողմից գրություններ են արվել նաեւ սոցիալական ցանցերում. TDI փորձագետ Գիորգի Նոնիաշվիլին գրում է.
«Աշնանը գաղտնի կերպով պատրիարքարանին հանձնեցին հայկական եկեղեցին, մեկնարկեց Թանդոյանցի ավերումն ու հայկական հետքի վերացումը, ձմռանը սկսեցին փորել Նարիկղալան եւ վերացնել մշակութային շերտերը: Նարիկղալան փորելու արդյունքում վերցված աղյուսները տեղափոխեցին Թանդոյանց:Հիմա Թանդոյանց եկեղեցու հիմքերի վրա ուղղափառ եկեղեցի կկառուցեն եւ բոլորը երջանիկ կլինեն: Եթե որեւէ մեկն այս երկրի մշակութային թշնամին է, դա առաջին հերթին Վրաստանի պատրիարքարանն է»:
«Հնագիտության պրոֆեսոր կա հայտնի եւ հարգված: Այս պրոֆեսորը 500 լարիով կեղծել է հնագիտական եզրակացությունը Միրզաշաֆայում: Նույն պրոֆեսորը Նարիկղալայի պատմական պատը քանդել է ծանր տեխնիկայով ապօրինաբար եւ վնասել ամրոցի պատի արտաքին հատվածը: ավերակներից ընտրել է աղյուսներ եւ նվիրել այն եկեղեցու կառուցման համար, որը վիճելի է համարվում հայ եւ վրաց եկեղեցիների միջեւ: Վերոնշյալ եկեղեցում էլ է ինքը հնագիտությամբ զբաղվել՝ որպես անկախ փորձագետ եւ այս անկախ փորձագետը եզրակացություն է արել, որ եկեղեցին վրացական է: Նրա այլ հերոսությունների վերաբերյալ տեղեկատվություն եմ հավաքում»,- իր գրառման մեջ նշել է Գիորգի Փխալաձեն, ով ավելի ուշ` մարտի 3-ին եւս մեկ գրություն է արել. «Երկուշաբթի ժամը 11-ին կանչել են դատախազություն 
հարցաքննության: Կարծում եմ հարցը վերաբերում է Նարիկղալայի գործին, որի մասին հրապարակային հայտարարություն էի տարածել: Դատախազություն այցելելիս իրավաբանական օգնության կարիք ունեմ»:
Օգտատերերից Ինգա Վաչեիշվիլին թեմայի վերաբերյալ ֆեյսբուքյան գրառում է արել, կոչ անելով իր բոլոր ընկերներին բարի գործ կատարել. « Որեւէ վայրում գտնել վրացական քաղցրեղենի նման աղյուսներ ՝ չափը 20-20: Քանակը կապ չունի, քանի որ դժվար է գտնել նման աղյուսներ: Կանխավ շնորհակալություն, սպասում եմ Ձեզ Աղմաշենեբելի 38 հասցեում:
