Թբիլիսիում «Սեկտոր 7» շինարարական ընկերության ղեկավարը ձերբակալվել է առանձնապես խոշոր չափերի խարդախության մեղադրանքով: Վրաստանի ներքին գործերի նախարարության տվյալներով՝ 31-ամյա կինը կառուցվող բազմահարկ շենքում բնակարաններ գնելու նպատակով ընկերության հետ պայմանագիր կնքած ավելի քան 160 ընտանիքներից գումար է յուրացրել։
Գումարը ստանալով՝ ընկերությունը չի ապահովել շինարարության ավարտը և բնակարանների սեփականության իրավունքի փոխանցումը։
«Դրա հետևանքով վնաս է կրել 161 քաղաքացի, իսկ վնասի չափը հասել է 11 միլիոն լարիի», — տեղեկացրել է նախարարությունը։
Հետաքննությունը շարունակվում է Վրաստանի քրեական օրենսգրքի 180-րդ հոդվածի 3-րդ և 4-րդ հոդվածներով: Այս հանցագործությունը պատժվում է մինչև 10 տարի ազատազրկմամբ։
