«Վրացական երազանք»-ը Սահմանադրական դատարանից պահանջել է արգելել նաև «Գախարիան Վրաստանի համար» կուսակցության գործունեությունը։ Մեծամասնության նիստից հետո այս որոշման մասին հայտարարել է Իրակլի Կիրցխալիան։
Նշված որոշումը կուսակցությունն ընդունել է մեծամասնության նիստում, ինչը նշանակում է, որ «Վրացական երազանք»-ը Սահմանադրական դատարանից հետ կկանչի հայցը և նորից կներկայացնի Վրաստանի գլխավոր դատարան։ Ըստ այդմ՝ 9-ամսյա ժամկետի հաշվարկը կսկսվի նորից։
«Այս շաբաթ Սահմանադրական դատարան կներկայացվի սահմանադրական հայցը, դուք բոլորդ շատ լավ գիտեք, թե ինչ սահմանադրական հայց ունենք ներկայացրած մի շարք, այսպես կոչված, կուսակցությունների դեմ, և այդ կուսակցություններին կավելանա «Գախարիան Վրաստանի համար» կուսակցությունը։
Մեր քաղաքական թիմը նրանց հնարավորություն տվեց, որ իրապես ներգրավվեին խորհրդարանական աշխատանքներում՝ չնայած նրանց անցյալին և կոլեկտիվ «Ազգային շարժման» հետ ուղղակի կոալիցիային, հնարավորություն՝ ներգրավվելու խորհրդարանական հարթակում, սակայն տեսանք հետևյալը․ առաջինը և ամենակարևորը՝ մեր երկրում սահմանադրական կարգի կոպիտ ու լկտի չճանաչումը և դրա շուրջ նրանց բազմաթիվ ապակառուցողական գործողությունները խորհրդարանում, մեկնաբանություններում և իրենց քայլերում։ Մեր հասարակության համար նորություն չէ, թե նրանք իրականում ինչ ուժ են ներկայացնում։
Այս հայցի պայմաններում ևս մենք չենք պահանջել մանդատների դադարեցում»,- հայտարարել է Իրակլի Կիրցխալիան։
Առաջին հայցը «Վրացական երազանք»-ը Սահմանադրական դատարան էր ներկայացրել 2025 թվականի հոկտեմբերի 31-ին և պահանջել 3 կուսակցությունների արգելումը («Միացյալ Ազգային շարժում», «Կոալիցիա փոփոխությունների համար», «Ուժեղ Վրաստան — Լելո»։
