Վրաստանի նախկին վարչապետ և ընդդիմադիր քաղաքական գործիչ Գիորգի Գախարիան Գերմանիայից անգլերեն արձագանքել է իր կուսակցությունն արգելելու «Վրացական երազանք»-ի նախաձեռնությանը։ Ըստ Գախարիայի` «Բիձինա Իվանիշվիլիի ռեժիմը» խորհրդարանում «չի կարողանում հանդուրժել» ոչ մի ընդդիմադիր կուսակցության։
«Չնայած խիստ սահմանափակումներին, մենք հետևողականորեն մասնակցել ենք բոլոր ընտրություններին, որոնք համարում ենք քաղաքական փոփոխությունների միակ խաղաղ և ժողովրդավարական ուղին», — սեպտեմբերի 15-ին գրել է Գախարիան X հարթակում։
«Մեր կուսակցությունը մնում է խորհրդարանում ներկայում գործող միակ ընդդիմադիր կուսակցությունը։ Մեզ վրա հարձակվելով՝ Իվանիշվիլին փորձում է արգելել երկրի միակ գործող խորհրդարանական ընդդիմությանը:
Չնայած խորհրդարանական մեծամասնություն ունենալուն` Իվանիշվիլիի ռեժիմը չի կարողանում հանդուրժել նույնիսկ մեկ ընդդիմադիր կուսակցություն խորհրդարանում, քանի որ քննադատական ձայներին հակադարձ փաստարկներ չունի», — գրել է քաղաքական գործիչը։
Նրա գնահատմամբ՝ «սա Վրաստանում պաշտոնապես ավտորիտար կառավարում հաստատելու և քաղաքական ընդդիմությանը ճնշելու Իվանիշվիլիի ռեժիմի հերթական քայլն է»։
