Վրաստանի խորհրդարանը երրորդ ընթերցմամբ ընդունել է «Կուտակային կենսաթոշակի մասին» օրենքում փոփոխությունները, որոնց համաձայն՝ բոլոր քաղաքացիների կուտակային կենսաթոշակն ինքնաբերաբար կմնա «ցածր ռիսկային» կատեգորիայում, եթե իրենք չորոշեն փոխել իրենց պորտֆելը։ Օրենքը գործի գցելու համար անհրաժեշտ է Վրաստանի նախագահի ստորագրությունը։
Փոփոխված այս կանոնը կգործի մինչև 2028 թվականի հունվարի 1-ը։ Նույն կարգավորումը գործում էր մինչև 2023 թվականի սեպտեմբերը` մինչև ուժի մեջ մտավ «Կուտակային կենսաթոշակ» օրենքի կարգավորումը, որը, ըստ տարիքային կատեգորիաների՝ քաղաքացիներին բաժանում էր տարբեր պորտֆելների:
Համաձայն «Կուտակային կենսաթոշակի մասին» գործող օրենքի՝ Կենսաթոշակային գործակալությունը քաղաքացիների կենսաթոշակային խնայողությունները բաշխել է, եթե նրանք, ըստ տարիքային կարգերի՝ խնայողությունները կամովին այլ պորտֆել չեն փոխանցել:
- մինչև 40 տարեկան աշխատողի կենսաթոշակային ֆոնդերը բաշխվելու են «աճող» (բարձր ռիսկային) ներդրումային պորտֆելում,
- 40-ից 50 տարեկան աշխատողի կենսաթոշակային ֆոնդերը բաշխվելու են «խառը» (միջին ռիսկի) ներդրումային պորտֆելում,
- 50 կամ 50 տարեկանից բարձր աշխատողի կենսաթոշակային ֆոնդերը բաշխվելու են «կայուն» (ցածր ռիսկային) ներդրումային պորտֆելում։
«Փոփոխության համաձայն, կուտակային կենսաթոշակի գործող մոդելը կմնա անփոփոխ մինչև 2028 թվականի հունվարի 1-ը, իսկ սխեմային մասնակցող բոլոր քաղաքացիների կուտակային կենսաթոշակը ավտոմատ կերպով կտեղադրվի ցածր ռիսկային պորտֆելում, քաղաքացիները կկարողանան փոխանցել իրենց խնայողությունները միջին կամ բարձր ռիսկային պորտֆելում միայն անհատական որոշմամբ»,- նշված է խորհրդարանի տարածած հաղորդագրության մեջ։
Օրենքի նախագծի ընդունմանը կողմ է քվեարկել 83 պատգամավոր։
