«Միացյալ ազգային շարժում» ընդդիմադիր կուսակցության նախագահի պաշտոնակատար Թինա Բոկուչավան հայտարարել է, որ դուրս չի գա կուսակցությունից։ Իր մտադրության մասին նա գրել է այն բանից հետո, երբ կուսակցության հիմնադիր Միխեիլ Սաակաշվիլին հայտարարել է, որ իր թեկնածուն այդ պաշտոնում հեռուստահաղորդավար Նանուկա Ժորժոլիանին է։
«Լրագրողների զանգերի հիման վրա ես անհրաժեշտ համարեցի ևս մեկ անգամ հստակ բացատրել այն, ինչ ասացի երեկվա ճեպազրույցի վերջում. իհարկե, ես մնում եմ «Ազգային շարժման» կազմում և, իհարկե, կպայքարեմ մինչև վերջ։ Վրաստանը կհաղթի», — գրել է Բոկուչավան Ֆեյսբուքում։
«Ազգային շարժման» նախագահի պաշտոնում Թինա Բոկուչավայի երկամյա ժամկետը լրանում է այս տարվա հուլիսի 8-ին։ Իր ժամկետի ավարտից մեկ ամիս առաջ Վրաստանի ազատազրկված երրորդ նախագահ Միխեիլ Սաակաշվիլին, որը կուսակցության հիմնադիրն է, սոցիալական ցանցում հայտարարել է. «Ես ոչ միայն փոխել եմ սանրվածքս, այլև արմատական փոփոխություններ եմ պլանավորում «Միացյալ ազգային շարժման» մեջ»։
Սաակաշվիլին Ուկրաինայի քաղաքացի է և չի կարող պաշտոն զբաղեցնել կուսակցությունում։
