Վրաստանի նախկին նախագահ Միխեիլ Սահակաշվիլին նոյեմբերի 4-ին հայտարարություն է տարածել, որտեղ նշում է, որ իր հիմնադրած «Միացյալ ազգային շարժում» կուսակցությունը նոր ղեկավարի ու քաղխորհրդի կարիք ունի:
Սահակաշվիլիի խոսքերով, կուսակցությունը պետք է կազմվի այնպիսի մարդկանցից, ովքեր չեն հանդիսանում խորհրդարանական ընտրությունների սխալ արշավի պատասխանատուները։ Ըստ նախկին նախագահի, պետք է լինեն մարդիկ, ովքեր կկարողանան հաղթահարել նոր մարտահրավերները:
«Ես միանգամայն կողմ եմ ներկուսակցական ժողովրդավարությանը և կոչ եմ անում խնդիրները քննարկել ոչ թե քաղխորհրդի փակ դռների ետևում, այլեւ ընդլայնված թիմով: Մենք պետք է կարողանանք հասկանալ ու վերլուծել մեր սխալները․ինչու չկարողացանք կանխել զանգվածային ընտրակեղծիքները։ Անհրաժեշտ է նաև նոր մարդկանց ընդգրկել թիմում, ինչն ավելի արդյունավետ կդարձնի Իվանիշվիլիի կլանային իշխանության դեմ պայքարը»,- Օդեսայից նման կոչ է արել Սահակաշվիլին:
Նոր ղեկավար ընտրելու առաջարկությանը կողմ է արտահայտվել նաև անազատության մեջ գտնվող կուսակցության ազդեցիկ դեմքերից Թբիլիսիի նախկին քաղաքապետ Գիգի Ուգուլավան. «Թող սա ոչ մեկի կողմից չընկալվի որպես դավաճանություն, ընդհակառակը՝ ընդհանուր գործում նույն կետից առաջ չանցնելն է դավաճանություն։ Ուստի պետք է ազատ և մրցակցային պայմաններում ընտրել նոր առաջնորդի»։
«Interpressnews»-ը տեղեկացնում է, որ իր նամակում Ուգուլավան նշել է նաև, որ ծանոթ չէ հարցի շուրջ Սահակաշվիլիի տեսակետին, բայց վստահ է, որ նա իր հետ համակարծիք կլինի:
