Վրաստանում գրեթե յուրաքանչյուր 4-րդ երեխան ապրում է աղքատության մեջ։ Այս մասին են վկայում Սոցիալական ծառայությունների և վիճակագրության ազգային ծառայության տվյալները։

Ավելի կոնկրետ, Սոցիալական ծառայությունների գործակալության վերջին՝ սեպտեմբերյան տվյալներով, Վրաստանում ապրուստի նպաստ է ստանում 219 հազար 54 երեխա (0-ից 18 տարեկան)։

Պաշտոնական տվյալներով՝ երկրում այս տարիքային խմբում գրանցված է 970 հազար 609 անձ։

Համապատասխանաբար, նշված տվյալները ցույց են տալիս, որ Վրաստանում յուրաքանչյուր չորրորդ երեխան ապրում է աղքատության գծից ցածր։

Ընդ որում, Սոցիալական ծառայությունների գործակալության վիճակագրությամբ՝ սոցիալապես անապահով երեխաների ամենաբարձր ցուցանիշը (բնակչության թվաքանակից ելնելով) ֆիքսվել է Թբիլիսիում (52 հազար 694 երեխա)։ Երկրորդ տեղում Քվեմո Քարթլիի տարածաշրջանն է՝ 39 հազխր 923 երեխայով, իսկ երրորդում՝ Իմերեթին (25 հազար 356 երեխա)։

Ըստ տարածաշրջանների՝ ապրուստի նպաստ ստացող 0-ից 18 տարեկան շահառուների քանակն այսպիսին է․

 Թբիլիսի — 52 հազար 694

 Քվեմո Քարթլի — 39 հազար 923

 Իմերեթի — 25 հազար 356

 Սամեգրելո-Զեմո Սվանեթի — 22 հազար 15

 Աջարիայի Ինքնավար Հանրապետություն — 22 հազար 668

 Կախեթի — 15 հազար 816

 Շիդա Քարթլի — 15 հազար 799

 Գուրիա — 7152

 Սամցխե-Ջավախեթի — 5389

 Մցխեթա-Մթիանեթի — 6389

 Ռաճա-Լեչխումի և Քվեմո Սվանեթի — 1960։

Ինչ վերաբերում է տարիքային բաշխվածությանը, ցուցանիշն ավելի բարձր է 6-18 տարեկանների կատեգորիայում, որտեղ աղքատության գծից ցածր գրանցված է 168 հազար 595 անձ։ 0-6 տարեկան հատվածում հաշվառված է 50 հազար 459 երեխա։