Վրաստանի կառավարությունը սահմանել է իրավապահ մարմինների համակարգման հարցերով Վրաստանի պետական նախարար Մամուկա Մդինարաձեի լիազորությունները: «Վրացական երազանք»-ի վարչապետ Իրակլի Կոբախիձեի ստորագրությամբ համապատասխան որոշումն արդեն հրապարակվել է:

Ըստ փաստաթղթի՝ այս պաշտոնը ստեղծվել է իրավապահ մարմինների միջև համագործակցության ուժեղացման, համատեղ գործողությունների պլանավորման խթանման, տեղեկատվության փոխանակման ստանդարտների ներդրման և դրանց գործունեության արդյունավետության գնահատման նպատակով:

Համաձայն որոշման՝ պետական նախարարը

• լուծում է իր իրավասության ոլորտին վերաբերող հարցերը,

• ունի պետական գաղտնիքին հասանելիության երաշխավորված իրավունք,

• իրականացնում է Ներքին գործերի նախարարության, Պետական անվտանգության ծառայության և Պետական պահպանության հատուկ ծառայության գործունեության ընդհանուր համակարգումը,

• Կառավարության անունից հաղորդակցվում է դատական իշխանության, Դատախազության և Պետական աուդիտի ծառայության հետ,

• համակարգում է ազգային անվտանգության ոլորտի հայեցակարգային փաստաթղթերի մշակումը և ներքին ու արտաքին սպառնալիքների վերլուծությունը,

• իրականացնում է վերոնշյալ գերատեսչությունների համակարգումը՝ օկուպացված տարածքներում տիրող իրավիճակի և պետական շահերին սպառնացող ռիսկերի գնահատման նպատակով,

• աջակցում է Վարչապետին ազգային շահերին սպառնացող ճգնաժամային իրավիճակների քաղաքական մակարդակով կառավարման հարցում,

• իրավասու է պետական մարմիններից տեղեկատվություն պահանջել, հրամաններ արձակել և Կառավարության քննարկմանը ներկայացնել իրավական ակտերի նախագծեր,

• մասնակցում է Կառավարության նիստերին:

Պետական նախարարին նշանակում և ազատում է Վրաստանի վարչապետը:

Հիշեցնենք, որ ապրիլի 21-ին հայտնի դարձավ Ներքին գործերի նախարարի փոփոխության մասին. Գելա (Գեկա) Գելաձեն տեղափոխվեց Պետական անվտանգության ծառայության ղեկավարի պաշտոնին՝ փոխարինելով Մամուկա Մդինարաձեին: Մդինարաձեի համար նոր պաշտոնը Կառավարության կառուցվածքում խորհրդարանը հաստատել էր ապրիլի 29-ին: