Ըստ «Վրացական երազանք»-ի վարչապետ Իրակլի Կոբախիձեի՝ Վրաստան-Չինաստան գործընկերության խորացումը երկու երկրների միջև տնտեսական և քաղաքական համագործակցության ուղղությամբ կոնկրետ արդյունքներ է բերել։ Այս հայտարարությունը նա արել է Վրաստանում Չինաստանի դեսպան Ջոու Ձյանի դիվանագիտական առաքելության ավարտի կապակցությամբ կազմակերպված միջոցառմանը։
Վարչապետի խոսքով՝ վերջին տարիներին Վրաստան-Չինաստան հարաբերությունները փոխադրվել են նոր փուլ։
«Մեր ընդհանուր ձգտումները հուսալի հիմք են ստեղծել Վրաստան-Չինաստան հարաբերությունների հետագա զարգացման համար։ Անցած մի քանի տարիների ընթացքում մեր գործընկերությունը փոխադրվել է նոր փուլ»,- ասել է Իրակլի Կոբախիձեն։
Նրա խոսքով՝ 2023 թվականին ռազմավարական գործընկերության հաստատումից հետո համագործակցությունն էլ ավելի է ընդլայնվել, իսկ ընթացիկ տարում երկրների միջև հարաբերությունները հասել են համապարփակ ռազմավարական գործընկերության մակարդակի։
«Այս տարի մեր հարաբերությունները հասցրինք համապարփակ ռազմավարական գործընկերության, ինչով նոր հնարավորություններ ստեղծվեցին քաղաքական և տնտեսական համագործակցության էլ ավելի ընդլայնման համար։ Մեր հարաբերություններում նոր փուլն արտացոլվեց նաև տնտեսական համագործակցության վրա։ Վերջին տարիներին երկու երկրների միջև առևտուրը կայուն աճում է։ Չինաստանը Վրաստանի երրորդ խոշորագույն առևտրային գործընկերն է և վրացական տեղական արտահանման համար երկրորդ կարևորագույն շուկան»,- ասել է վարչապետը։
Իրակլի Կոբախիձեի գնահատմամբ՝ առանց վիզայի ռեժիմն ու օդային կապերի ընդլայնումը նպաստել են երկու երկրների միջև տնտեսական հարաբերությունների զարգացմանը։
«Առանց վիզայի ռեժիմն էապես նպաստեց այցելուների թվի աճին։ Այս աճող հետաքրքրությանը նպաստում է ակտիվացված օդային հաղորդակցությունը։ Այսօր չինական երեք ավիաընկերություն կանոնավոր չվերթեր է իրականացնում Վրաստանի ուղղությամբ, ինչը նոր հնարավորություններ է ստեղծում զբոսաշրջության, բիզնեսի և ներդրումների համար»,- հայտարարել է նա։
Վարչապետի խոսքով՝ Թբիլիսիի և Շանհայի միջև ուղիղ ավիահաղորդակցության մեկնարկը ծառայում է երկու երկրների միջև կապերի ամրապնդմանը։
«Թբիլիսիի և Շանհայի միջև ուղիղ ավիահաղորդակցության մեկնարկն էլ ավելի ամրապնդեց փոխկապակցվածությունը, երկրներն իրար մոտեցրեց և ճանապարհորդությունը դարձրեց ավելի մատչելի։ Այս շոշափելի արդյունքները վկայում են, որ մեր գործընկերությունն իրական օգուտ է բերում երկու կողմերին»,- ասել է Իրակլի Կոբախիձեն։
Նա նաև նշել է, որ Վրաստանը բարձր է գնահատում Չինաստանի հետ համագործակցությունը։
«Մենք հատկապես բարձր ենք գնահատում այն, որ Չինաստանը Վրաստանին մշտապես դիտարկում է որպես հավասար և հարգված գործընկեր։ Դիվանագիտության էությունը վստահության ձևավորումն է, երկխոսության համար ուղիներ բացելը, ընդհանուր շահեր գտնելը և այնպիսի կամուրջներ կառուցելը, որոնք մեր ժողովուրդներին միմյանց հետ համագործակցելու հնարավորություն են տալիս»,- հայտարարել է վարչապետը։
Ելույթի ավարտին Իրակլի Կոբախիձեն շնորհակալություն է հայտնել Վրաստանում Չինաստանի դեսպան Ջոու Ձյանին կատարած աշխատանքի համար և հաջողություն մաղթել հետագա գործունեության մեջ։
