Վրաստանի առողջապահության նախարարության հաղորդմամբ՝ Տեղահանվածների գործակալությունը ամբողջ երկրի տարածքում բնակելի տներ կգնի հարկադիր տեղահանված շուրջ 300 ընտանիքի համար։

Այն ընտանիքների ցուցակը, որոնց վերաբնակեցման վերաբերյալ տեղահանվածների հարցերն ուսումնասիրող հանձնաժողովը դրական որոշում է կայացրել, արդեն հրապարակվել է գործակալության վեբկայքում։

Հարկադիր տեղահանված ընտանիքներին տրվում է վեցամսյա ժամկետ, որպեսզի Վրաստանի ցանկացած տարածաշրջանում տներն ինքնուրույն ընտրեն և ներկայացնեն գործակալություն։

Նախարարության հաղորդմամբ՝ տեղահանված ընտանիքների վերաբնակեցման նպատակով, բնակելի համալիրների կառուցմանը զուգահեռ, տների գնման ծրագիրը վերջին շրջանում ակնհայտորեն ակտիվացել է։ Ընթացիկ տարում գործակալությունն արդեն տուն է գնել 1640 տեղահանված ընտանիքի համար։

«Հարկադիր տեղահանված ընտանիքներին բնակարանով ապահովելու գործընթացը ապագայում էլ ավելի ակտիվ ռեժիմով կշարունակվի»,- նշված է նախարարության տարածած հաղորդագրության մեջ։