Սեպտեմբերի 11-13-ը Վրաստանի արտգործնախարար Դավիթ Զալկալիանին կմեկնի Ուզբեկստանի հանրապետություն: Այս մասին հայտնում են Վրաստանի արտաքին գերատեսչությունից։
Այցի շրջանակներում ԱԳ-ի նախարարը հանդիպումներ կունենա Ուզբեկստանի փոխվարչապետ Ազիզ Աբդուխակիմովի, արտգործնախարարի վարչակազմի ղեկավար Աբուլազիզ Կամիլովի և Ուզբեկստանի Օլի Մեջլիսի սենատի նախագահի առաջին տեղակալ Սոդիկ Սաֆոևի հետ: Բացի այդ, Դավիթ Զալկալիանին կմասնակցի Վրաստանի և Ուզբեկստանի միջև դիվանագիտական հարաբերությունների հաստատման 25-ամյակին նվիրված միջոցառմանը:
«Հատկանշական է, որ երկու երկրների միջև դիվանագիտական հարաբերությունների հաստատման տարեդարձի և Վրաստանի անկախության օրվա առթիվ Ուզբեկստանում Վրաստանի դեսպանատունը վրացի արվեստի գործիչների մասնակցությամբ կազմակերպելու է լայնածավալ մշակութային միջոցառում: Միջոցառմանը հրավիրված են Ուզբեկստանի գործադիր և օրենսդիր մարմինների, Ուզբեկստանում հավատարմագրված դիվանագիտական կորպուսի ներկայացուցիչները, Վրաստանի խորհրդարանի անդամները, ուզբեկական մշակույթի և գործարար շրջանակների ներկայացուցիչները», — ասված է հաղորդագրությունում:
