Ըստ ՄԱԿ-ի Բնակչության հիմնադրամի (UNFPA) նորագույն հետազոտության` Վրաստանում հարցված քաղաքացիների 68%-ին անհանգստացնում է գործազրկությունը, իսկ 67%-ին՝ տնտեսական ճգնաժամը։

Բացի վերոնշյալից, գլխավոր խնդրահարույց հարցերի թվում են հակամարտությունները, ահաբեկչությունը, կազմակերպված հանցավորությունը, տնտեսական ու քաղաքական խնդիրները։

Վրաստանի քաղաքացիներին ամենից շատ մտահոգող հարցերի պատկերը հետևյալ տեսքն ունի.

 Հակամարտություններ և պատերազմներ – 80%

 Ահաբեկչություն – 73%

 Կազմակերպված հանցավորություն – 69%

 Գործազրկություն – 68%

 Տնտեսական ճգնաժամ – 67%

 Գլոբալ համաճարակներ – 61%

 Քաղաքական անկայունություն – 60%

 Թուլացած ժողովրդավարություն – 60%

 Աճող անհավասարություն – 57%

 Փախստականներ – 54%

 Բնակչության ծերացում – 47%

 Կլիմայի փոփոխություն – 46%

 Գերբնակեցում – 35%

 Արհեստական բանականություն – 26%

Դրան զուգահեռ, Վրաստանում հետազոտության մասնակիցները նշել են, որ 18–21 տարեկան հասակում ծնողների տնից տեղափոխվելը նորմալ երևույթ է համարվում, սակայն վարձակալության բարձր գներն ու ցածր աշխատավարձերը դա գործնականում անհնարին են դարձնում։

«Անկախություն եմ ուզում, բայց Վրաստանում աշխատող ուսանողի դեպքում տան վարձ վճարելն ուղղակի անհնար է»,- պատասխանել է հետազոտությանը մասնակցած Վրաստանի քաղաքացիներից մեկը։

Նշված հետազոտությունն իրականացվել է 2025 թվականին՝ Արևելյան Եվրոպայի և Կենտրոնական Ասիայի 11 երկրներում ու տարածքներում՝ Ադրբեջանում, Բոսնիա և Հերցեգովինայում, Վրաստանում, Ղազախստանում, Ղրղզստանում, Մոլդովայում, Հյուսիսային Մակեդոնիայում, Սերբիայում, Ուկրաինայում, Ուզբեկստանում և Կոսովոյում (ՄԱԿ-ի Անվտանգության խորհրդի 1244 բանաձև)։ Հարցմանը մասնակցել է ինտերնետային հասանելիություն ունեցող, 18-ից 39 տարեկան ավելի քան 13 հազար 500 ռեսպոնդենտ։