Վրաստանի կենտրոնական գնումների մարմինը հայտարարել է միավորված մրցույթ (տենդեր) 319 նոր պիկապի ձեռքբերման նպատակով։ Գնման նախահաշվային արժեքը կազմում է 28 մլն 836 հազար 643 լարի։
Գնման շրջանակներում նախատեսվում է հատուկ դասի պիկապների ձեռքբերում, որոնք կբաշխվեն տարբեր պետական գերատեսչությունների միջև։ Ամենամեծ քանակությունը կփոխանցվի Սննդամթերքի ազգային գործակալությանը՝ 90 միավոր, Անտառային ազգային գործակալությանը՝ 50 միավոր, Գազի տրանսպորտացման ընկերությանը՝ 33 միավոր, Ֆինանսների նախարարության քննչական ծառայությանը՝ 30 միավոր, իսկ Բնապահպանական վերահսկողության դեպարտամենտին՝ 28 միավոր։
Ավտոմեքենաներ կստանան նաև «Վրաստանի մելիորացիան» (25 միավոր), Եկամուտների ծառայությունը (18 միավոր), Պահպանվող տարածքների գործակալությունը (10 միավոր), Վայրի բնության ազգային գործակալությունը (9 միավոր), Աջարիայի անտառային գործակալությունը (5 միավոր) և այլ գերատեսչություններ։
Մրցույթի պայմանների համաձայն՝ ավտոմեքենաները պետք է լինեն լիաքարշ (4×4) համակարգով, մեխանիկական առնվազն 5-աստիճան փոխանցման տուփով և նվազագույնը 102 ձիաուժ հզորությամբ շարժիչով։ Պիկապի երկարությունը պետք է լինի առնվազն 5 մետր, լայնությունը՝ 1,755 մետր, իսկ բարձրությունը՝ 1,760 մետր։
Գնման տեխնիկական պահանջները ներառում են նաև անվտանգության առնվազն երկու բարձիկ, ABS համակարգ, օդորակիչ, ձայնային համակարգ, ղեկի ուժեղացուցիչ, առջևի դռների էլեկտրական ապակեբարձիչներ և պահեստային անվադող։
Մատակարար ընկերությունը պետք է լինի ավտոմեքենայի արտադրողի պաշտոնական ներկայացուցիչը և Վրաստանում ունենա համապատասխան սպասարկման կենտրոն։ Տրանսպորտային միջոցների հիմնական հանգույցների՝ շարժիչի, կամրջակի և փոխանցման տուփի համար նախատեսված է 5-ամյա երաշխիք, իսկ ամբողջական ավտոմեքենայի համար՝ 3 տարի կամ 150 հազար կիլոմետր վազք՝ նայած թե որ պայմանը ավելի շուտ կլրանա։
Մրցույթի շրջանակներում պահանջվում է նաև ավտոմեքենայի անվտանգության համապատասխանությունը հաստատող փաստաթուղթ, որը կարող է լինել միջազգային վթարափորձարկման վկայական, այդ թվում՝ Euro NCAP-ի, IIHS-ի, JNCAP-ի կամ Latin NCAP-ի գնահատականը։
Մրցույթում հայտերի ընդունումը կսկսվի օգոստոսի 2-ին և կավարտվի օգոստոսի 3-ին։ Ավտոմեքենաների մատակարարումը պետք է իրականացվի պայմանագրի կնքումից հետո 210 օրացուցային օրվա ընթացքում։
