2026 թվականի հունվար-մայիս ամիսներին Վրաստանում տուգանքներից և պատժամիջոցներից բյուջե մուտքագրված գումարը տարեկան կտրվածքով աճել է 77%-ով (105 միլիոն լարի), իսկ միայն ճանապարհային երթևեկության կանոնների խախտման տուգանքներից ստացված եկամուտը՝ 78%-ով (գրեթե 57 միլիոն լարի)։

Ավելի կոնկրետ, Վրաստանի համախմբված բյուջեի մուտքերի տվյալների համաձայն՝ այս տարվա 5 ամսվա ընթացքում պատժամիջոցներից, տույժերից և տուգանքներից ստացված եկամուտը կազմել է 241 մլն 231 հազար 419 լարի` այն դեպքում, երբ 2025 թվականի հունվար-մայիսին այդ ցուցանիշը 136 մլն 31 հազար 72 լարի էր։

Ըստ տվյալների՝ 2026 թվականի 5 ամսում բյուջե մուտքագրված 241 միլիոն լարիից ավելի քան 196.216 միլիոն լարին բաժին է ընկնում վարչական իրավախախտումների տուգանքներին։ Համեմատության համար նշենք, որ նախորդ տարվա նույն ժամանակահատվածում այս նույն հոդվածով բյուջե էր մուտքագրվել 106.835 միլիոն լարի։

Աճել է նաև ճանապարհային երթևեկության կանոնների խախտման արդյունքում բյուջե մուտքագրված գումարի ծավալը։ Մասնավորապես, Ֆինանսների նախարարության տվյալներով՝ այս տարվա հունվար-մայիս ամիսներին ճանապարհային երթևեկության կանոնների խախտման տուգանքներից գանձապետարան է մուտքագրվել 129 մլն 664 հազար 514 լարի, իսկ 2025 թվականի նույն ժամանակահատվածում՝ 72 մլն 796 հազար 755 լարի։